مؤلف مسلسل حكيم باشا يتعرض للابتزاز: قالولي يا تدفع يا نهاجمك - شبكة أطلس سبورت

كشف السيناريست محمد الشواف، مؤلف مسلسل حكيم باشا، عن تعرضه للابتزاز من قبل بعض الأشخاص المجهولة الذين خيروه بين دفع مبلغ مالي أو شن حملة هجوم عليه وعلى العمل.

مؤلف مسلسل حكيم باشا يتعرض للابتزاز

وكتب محمد الشواف في منشور رصده موقع تحيا مصر: أنا آسف حقيقي إني أكتب الكلام ده بس بقالي يومين  تلاتة بيجيلي تليفونات غريبة ومريبة من ناس وأرقام بتظهر على ترو كولر باسم الشبح وعرب وغيرها بيعرضوا عليا إنهم يعملوا حملات دعم لـ مسلسل حكيم باشا وإنهم يدعموا المسلسل ع السوشيال ميديا مقابل ٥٠ ألف جنيه لمدة اسبوع وقالولي على سعر الترند على اكس وان اسمي يتبروز وصفحات تتكلم عني باعتباري اجمد سيناريست في مصر.

واضاف مؤلف مسلسل حكيم باشا: واللي يعرفني عارف كويس اني لا بتاع زيطة ولا منظرة ولا بتكلم عن شغلي ولا بشكر في حاجة عملتها وبتقبل أي رأي سلبي قبل إيجابي عن حاجة بعملها 
رفضت بأدب العرض لأنه شايفه رخيص فكان الرد إنهم هيخلوا صحفيين معروفين يهاجموا السيناريو وكاتب السيناريو بتاع حكيم باشا لو ما دفعتش بالتي هي أحسن واتقالي نصا ده اكل عيشنا واللي معانا أسامي كبيرة وهيخلوك مسخرة الفيس بوك والتيك توك واكس واجوارها فاقترحت عليهم يعملوا على انستجرام كمان عشان يكملوا الباكدج ولو اني متأكد ان مفيش صحفي محترم ممكن يعمل كده.

محمد الشواف: مش هدفع لمأجورين عشان يشكروا فيا

واضاف: بعيدا بقى عن إن مفيش إجماع على أي عمل في الدنيا من صنع البشر فطبيعي ناس تحب حكيم باشا وناس تشوفه عادي وناس تكرهه وناس تشوفه دون المستوى لولا اختلاف الاراء كنا جميعا نقعد في البيت احنا بنجتهد ويكفيني لو شخص واحد بس عجبه رسالة المسلسل لكن أبدا مش هدفع فلوس عشان اقول اني جامد فشيخ لاني ما اجيش حاجة جنب الاساتذة الكبار زمايلي اللي ليهم شغل قدي ١٠ مرات فمش محتاج اناطح حد واقول شغلي اهو عشان ده رخص.

واستكمل: ولا هدفع لمأجورين عشان يشكروا فيا ولو حد منهم طلع قال عني اني اسوأ سيناريست فأنا مقدر حجم ألمه من ضياع سبوبته والقرش الحرام اللي مستنيه مني أنا اسف لكل اللي هيكتب كلمتين وحشين في حقي شخصيا وآسف لكل حد مش عاجبه المسلسل بوعدك اعمل مجهود اكبر السنة الجاية واسف لأي حد طالب مني تصريحات لمكانه المحترم لاني حقيقي مش بحب اتكلم عن شغلي.

مؤلف مسلسل حكيم باشا: اللي انتقدوا العمل رأيهم فوق دماغي

واختتم: فيه اساتذة كبار قيّموا حكيم باشا من اول يوم وكلامهم فوق راسي وناس كتير انتقدوا حاجات في حكيم برضه ورأيهم فوق دماغي لكن اللي عاوز فلوس عشان يقول كلمتين في حقي ارجوك تكمل حملاتك ضدي بكل قوة وتكتب اسوأ ما في المسلسل عشان أتعلم منك.. واعتذرلكم جميعا اني ضيعت عليكم سبوبة وأظن أساتذتي المحترمين اللي ليهم أعمال برضه مش هيقبلوا يعرقوكم عشان تكتبوا كلام حلو عنهم.