كشف المخرج محمد دياب عن كواليس مسلسل أشغال شقة قبل إنتاجه، وذلك من خلال منشور عبر حسابه الشخصي على موقع التواصل الاجتماعي فيسبوك.

محمد دياب: محدش كان عاجبه فكرة مسلسل أشغال شقة

وكتب محمد دياب في منشوره الذي يرصده موقع تحيا مصر: الحمد لله أشغال شقه للسنه التانيه ينجح نجاح ساحق، بس ورا النجاح ده قصه، اشغال شقه ده لمده خمس سنين بيتعرض علي منتجين مصر كلهم و لكن مكانش فيه حماس ليه، تقريبا معظم ممثلين مصر رفضوه رجاله و ستات.  و لما مره نجم كبير تحمسله و مضاه فضل يطلب تغييرات لدرجه انه في الآخر طلب ان شغل البطل يتغير و تتشال فكره الشغالات!.

وتابع: في ناس مكانتش عاجباها الفكره و ناس كانت شايفه اننا بنكتب جد فمش هنعرف نعمل كوميدي، و ناس عايزه الفكره بس اللي يخرجها حد تاني غير خالد، رد الفعل ده كان هيجنن خالد وشيرين، احساس صعب لما تبقي مؤمن بحاجه و اللي حواليك مش شايفنها، ساعات ده بيشككك في نفسك. اربع سنين تعدي و مينزلش لخالد و شيرين أي مشروع،  الضغط خلي خالد يقبل ان اشغال شقه يتعمل و لو بمخرج تاني. خالد لأي حد يعرفه هو اكتر انسان كوميدي تقدر تعرفه و انا و شيرين كان عندنا قناعه انه من اشغال شقه هيطلع كوميديته الخاصه اللي هتكسر الدنيا.  

محمد دياب عن مسلسل أشغال شقة: هشام ماجد آمن بيه

وتابع محمد دياب: بصعوبه شديده رجع خالد و شيرين يحاولوا ورا المسلسل،  لغايه لما جه هشام ماجد اللي آمن بيه و بخالد كمخرج و جت شركه الأنتاج (اي برودسيرز) اللي هيأتله اسباب النجاح.

واضاف: اشغال شقه نجح و استخدم توليفه كتابيه مختلفه مش قايمه عالإيفيهات، و خالد كمخرج طلع عنده صوت و شخصيه و رؤيه بصريه باينه في كل مشهد. انا طول عمري بتفرج علي كوميديا المسلسلات و ابتسم كام مره و ابقي مرضي، بس ان الواحد يضحك بصوت و لغايه لما بطنه توجعه و ده يحصل كل حلقه، فمتخيلتهاش تحصل في مسلسل.

محمد دياب عن أشغال شقة: كل تأخيرة وفيها خيرة

واختتم محمد دياب منشوره: بالنسبالي المخرج و المؤلف الشاطرين هما اللي بيعملوا حاجه احس اني معرفش اعملها و انا لما بتفرج علي اشغال شقه ببقي متأكد اني معرفش اعمل منه مشهد، فعلاً كل تأخيره و فيها خيره.