علقت الفنانة مي عمر على الانتقادات التي طالت مسلسلها إش إش، الذي يعرض حاليا ضمن قائمة مسلسلات رمضان 2025، وذلك من خلال لقاء تلفزيوني لها بأحد القنوات التلفزيونية.

مي عمر: برفض تقديم أي عمل مخالف لقوانين المجتمع

وقالت مي عمر في تصريحاتها التي يرصدها موقع تحيا مصر: أنا أرفض أني أقدم أي حاجة مخالفة لقوانين المجتمع أو بتهدم أفكاره، وأتحدى أي حد يقولي أن المسلسل بيهدم قيم المجتمع، يمكن الفكرة دي كانت اتاخدت لما شافوا البرومو وأخدوا جملة وقالوا إيه دا، لكن لما يتفرجوا على المسلسل هيلاقوا أن الجمل بتتقال في سياق آخر.. إحنا عندنا قصة اجتماعية مفيش أي حاجة خادشة ولا مشهد خادش، وحتى الرقص معمول باحترام شديد والبدل معموله باحترام شديد، إحنا بنحترم المجتمع والجمهور وعاملين مسلسل بجد فيه دراما حلوة.

وتابعت مي عمر: الألفاظ هو في الآخر مجتمع مختلف مجتمع راقصات فأكيد ليهم لغة مختلفة غير لو عملتي محامية أو دكتورة، هما ليهم اللغة بتاعتهم اللي لازم تستخدميها عشان تحسي باختلاف الشخصية، لو خليتها تتكلم زي "نعمة" أو أي دور عملته هيبقى إيه الفرق، لكن المسلسل عدى على الرقابة وواخد تصنيف (+18)، مينفعش حد يتفرج ويقول أصل بنتي عندها 5 سنين فسمعت لفظ، حتى الألفاظ مفيش حاجة جريئة أو خادشة لكن هي مناسبة مع البيئة اللي عايشين فيها.

شخصية مي عمر في مسلسل إش إش

وسبق وأن تحدثت الفنانة مي عمر عن تفاصيل شخصيتها في مسلسل إش إش الذي من المقرر طرحه في الموسم الرمضاني المقبل، وذلك من خلال لقاء لها ببرنامج et بالعربي.

وقالت مي عمر في تصريحاتها التي يرصدها موقع تحيا مصر: المسلسل دا مختلف أوي.. مش شبه أي حاجة عملتها قبل كدا السنة اللي فاتت كانت شخصية مختلف أوي عني، شخصية المحامية والسنادي حبيت أعمل شخصية مختلفة خالص اللي هي شخصية إش إش، بندخل جوا حياة الراقصات، دايما بنشوفهم من برا ومش كتير بندخل جوا حياتهم بالذات الشخصية اللي أنا بقدمها هي مش رقاصة معروفة هي بتشتغل في أفراح شعبية فبتشوفي بيتها وعيلتها عاملين ازاي وايه معاناتها.

أخر أعمال مي عمر

ومن الجدير بالذكر أن أخر أعمال محمد سامي مسلسل إش إش والذي تدور أحداثه حيث ترث (إش إش) جمال والدتها وفقرها، وتجد نفسها تعمل راقصة رغمًا عنها، ثم تدخل بالصدفة إلى عالم عائلة (آل الجريتلي)، لتكتشف أن حاضرها المأساوي ليس إلا امتدادًا لأسرار عائلية مدفونة لدى هذه العائلة.

مسلسل إش إش يشارك في بطولته عدد كبير من النجوم والنجمات منهم: مي عمر، هالة صدقي، انتصار، ماجد المصري، محمد الشرنوبي، ادوارد، وغيرهم، والمسلسل من تأليف وإخراج محمد سامي.